КВАША — кісла-салодкая мучная страва. Гатавалі з сумесі жытняй і грэцкай, радзей — толькі з жытняй мукі. Муку разводзілі цёплай вадой, потым залівалі варам (або наадварот — залівалі халоднай вадой і ставілі ў цёплае месца), каб набыла салодкі смак (усаладжала), потым заквашвалі скарынкай хлеба.
Кваша кісла ноч, раніцой варылі. Часам квашу рабілі з прасяных круп, якія папярэдне змочвалі. Вядома на Цэнтральным Палессі (Лунінецкі, Жыткавіцкі, Ельскі, Лельчыцкі, Столінскі раёны). Падобна да
кулагі, саладухі.