ЛАНДШАФТНАЯ APXIТЭКТУРА — мастацтва гарманічна спалучаць ландшафтныя прыродныя ўмовы і створаныя чалавекам элементы ландшафту. Уключае садова-паркавае мастацтва, сядзібна-паркавыя ансамблі, азеляненне і водны ландшафт. У Беларусі як асобная галіна вылучаецца з 1960-х гг. Сродкі ландшафтнай архітэктуры выкарыстаныя пры стварэнні мемарыяльных (Хатынь і Дальва ў Лагойскім, Курган Славы ў Смалявіцкім раёне, урочышча Гай каля Баранавічаў і інш.) і рэкрэацыйных (возера Нарач, Заслаўскае вадасховішча) комплексаў, водна-зялёных сістэмаў гарадоў (Мінска, Брэста, Віцебска, Гомеля, Гродна), будаўніцтве аўтамабільных дарог, асобных архітэктурных аб'ектаў (спартыўны комплекс у Раўбічах Мінскага раёна).