«ЛІНІЯ СТАЛІНА» — гісторыка-культурны комплекс. Размешчаны за 30 км на паўночны захад ад Мінска каля г.Заслаўе. Створаны ў 2004-05 гг. дабрачынным фондам дапамогі воінам-інтэрнацыяналістам «Памяць Афгана» (заснавальнік і кіраўнік А.М.Мятла) пры падтрымцы Савета Бяспекі, Міністэрства абароны Рэспублікі Беларусь, Мінскага абласнога выканаўчага камітэта, камандавання пагранічных і ўнутраных войск, грамадскіх арганізацый, прадпрыемстваў і інш. Адкрыты 30.06.2005 г. Навуковы кіраўнік комплексу А.Ю.Базарноў.

Комплекс уяўляе сабой ваенна-гістарычны музей пад адкрытым небам. Яго гістарычную аснову складаюць захаваныя доўгачасовыя агнявыя пункты (ДОТы) Мінскага ўмацаванага раёна, які ўваходзіў у сістэму ўмацаваных раёнаў, створаную ў канцы 1920-х — пачатку 1930-х гг. на старой заходняй граніцы СССР (праіснавала да 1939 г.). Гэта сістэма атрымала неафіцыйную назву «Лінія Сталіна».

На плошчы 25,78 га размешчаны 4 ДОТы, ДЗОТ (дрэва-земляны агнявы пункт), бліндажы, траншэі, акопы, супрацьтанкавыя равы, іншыя віды інжынерных загарод і 4 пляцоўкі, на якіх прадстаўлены зброя і ваенная тэхніка перыяду Вялікай Айчыннай вайны і пасляваенных гадоў. На штучным вадаёме дэманструюцца пантонная пераправа і нізкаводны інжынерны мост, пабудаваны беларускімі ваеннымі інжынерамі па чарцяжах даваенных гадоў. Створана стылізаваная партызанская вёска з экспазіцыяй, якая раскрывае гісторыю партызанскага руху ў Беларусі.

У экспазіцыі музея (2008) больш за 170 буйных экспанатаў, сярод якіх ракетныя комплексы, самалёты і верталёты, самаходныя артылерыйскія сістэмы, цягачы і транспарцёры, a таксама ўзоры стралковай зброі, ваеннай формы і амуніцыі, розных дакументаў.

Акрамя экскурсій на тэрыторыі комплексу праводзяцца тэатралізаваныя прадстаўленні з рэканструкцыяй баявых дзеянняў часоў Вялікай Айчыннай вайны, Дні прызыўнікоў, ушанаванне ветэранаў, воінаў беларускай арміі, прафесійныя святы розных сілавых структур, маладзёжныя і міжнародныя акцыі.

---

Адрас: размяшчаецца каля вёскі Лашаны Мінскага раёна ў 6 км ад Заслаўля ў накірунку на Маладзечна. Офіс знаходзіцца ў Мінску: 220030 г.Мінск, плошча Свабоды, 15
Тэл.: +375 17 503-20-20; +375 17 503-23-43; +375 17 210-46-30