ЛОДКА — назва рачных суднаў розных тыпаў, памераў і канструкцыі. Упершыню ўпамінаецца ў летапісах ХІІІ ст. У перыяд позняга феадалізму тэрмін «лодка» паступова страціў збіральнае, абагульняльнае значэнне. З ХІХ ст. лодкамі сталі называць невялікае судна для рыбалоўства, плытагонства, палявання, мясцовых перавозак людзей і грузаў.

Лодкі бываюць двух тыпаў: выдзеўбаныя аднадрэўкі (човен, камяга, дубіца, дуб, шугалея) і дашчаныя (лодка, дашчанік, чайка). Дашчаныя лодкі пачалі вырабляцца ў 2-й палове ХІХ ст. Да пачатку ХХ ст. дзякуючы сваёй зручнасці, лёгкасці, устойлівасці яны амаль поўнасцю выцеснілі традыцыйныя чаўны.

У наш час рыбакі карыстаюцца дашчанымі лодкамі, часта з маторам.