МАГІЛЁЎСКІ АБЛАСНЫ МАСТАЦКІ МУЗЕЙ імя П.В.Масленікава заснаваны ў г.
Магілёў паводле рашэння Магілёўскага аблвыканкама ад 19.11.1990 г. як абласны мастацкі музей, з 1996 г. імя народнага мастака Рэспублікі Беларусь П.В.Масленікава. Знаходзіцца ў двухпавярховым з мансардай будынку былога сялянска-пазямельнага банка — помніку архітэктуры пачатку 20 ст. Адкрыты для наведвальнікаў у 1990 г. Дзейнічаў як карцінная галерэя. У 1994 г. адкрыта першая пастаянная экспазіцыя ў 2 залах. Першы дырэктар музея В.В.Сайко. З 2000 г. дырэктар А.Б.Хахракоў.
Асноўны фонд музея (2008) налічвае 3238 адзінак захоўвання, дапаможны — 779 адзінак. Агульная плошча 3076 м², экспазіцыйная — 1169,52 м². У музейнай калекцыі мастацкія творы П.В.Масленікава (125 адзінак), падараваныя гораду з юбілейнай выстаўкі, прысвечанай 80-годдзю з дня яго нараджэння (склалі аснову першай пастаяннай экспазіцыі), сучасных беларускіх мастакоў, якія нарадзіліся або жывуць і працуюць на Магілёўшчыне, знакамітых мастакоў Беларусі, Расіі, Украіны, замежжа, а таксама мастакоў-удзельнікаў міжнародных пленэраў, скульптурныя працы У.Летуна (64 адзінкі), творы старажытнабеларускага мастацтва Магілёўшчыны.
Цяпер у музеі 24 выставачныя залы, 14 з іх — з пастаяннай экспазіцыяй. У 5 добра абсталяваных залах разгорнута рэтраспекцыя творчасці П.В.Масленікава (з 1997 г.), яго дзейнасць як тэатральнага дэкаратара і мастака-жывапісца, існуе яго мемарыяльны пакой. Тут прадстаўлены яго карціны і тэатральна-дэкарацыйныя працы. У мемарыяльнай зале, прысвечанай жыццю і творчасці У.Летуна (з 2002 г.), зробленай на падставе дара сям'і, экспануюцца 64 скульптурныя работы майстра. У мансардных пакоях будынка абсталяваны 4 залы, дзе з 2007 г. дзейнічае пастаянная выстаўка «Захаваная спадчына». У іх прадстаўлены раздзелы: манументальны фрэскавы жывапіс 18 ст., іканапіс,
магілёўская школа гравюры 17 — 18 стст., скульптура 18 ст., рэчы дэкаратыўна-прыкладнога мастацтва,
кафля 14 — 17 стст., фрагменты іканастаса 17 ст. У астатніх 10 залах размешчаны часовыя выстаўкі.
У музеі арганізавана і праведзена больш за 300 выставачных праектаў: міжнародныя, рэспубліканскія, абласныя, у межах якіх адбыліся персанальныя выстаўкі мастакоў; рэгіянальныя. Плануецца адкрыццё экспазіцыі «Выяўленчае мастацтва Магілёўшчыны 20 стагоддзя».
З 1996 г. музей з'яўляецца цэнтрам правядзення штогадовых міжнародных пленэраў па жывапісе «Вобраз Радзімы ў выяўленчым мастацтве», прысвечаныя славутым землякам В.К.Бялыніцкаму-Бірулі, П.В.Масленікаву, М.В.Неўраву. Супрацоўнікамі музея распрацаваны і праводзяцца музейныя заняткі, лекцыі, праграма эстэтычнага выхавання «Дом, дзе жыве мастацтва», арганізоўваюцца тэматычныя экскурсійныя маршруты па
горадзе («Архітэктурным стылі 19 — пачатку 20 стст.», «Стары Магілёў», «Пластычная мова скульптуры», «Свята-Мікольскі манастыр 17 ст.» і г.д.), міні-выстаўкі і інш.
Адрас: 212030, г.Магілёў, вул.Міронава, 33
Тэл.: +375-222-31-03-21; +375-222-31-04-25