МАГІЛЁЎСКІ МУЗЕЙ ЭТНАГРАФІІ — філіял
Магілёўскага абласнога краязнаўчага музея імя Е.Р.Раманава. Створаны ў 1980 г. рашэннем Магілёўскага аблвыканкама. Да 1996 г. — аддзел Магілёўскага абласнога краязнаўчага музея. Для наведвальнікаў адкрыты ў 1981 г. як філіял. Філіялам кіравалі А.А.Седзін, з 1999 г. — С.Б.Рыбакова.
Асноўны фонд музея (2008) налічвае 2400 экспанатаў. Плошча экспазіцыйных памяшканняў 692 м². Музей мае 2 пастаянныя экспазіцыі — «Зямлі роднай кругавод», «
Магілёў губернскі» і выставачную залу для зменных экспазіцый (плошча 84 м²).
Першая экспазіцыя адкрылася ў 1999 г. У ёй адлюстраваны асаблівасці культуры і побыту самага шматлікага ў канцы 19 — пачатку 20 стст. саслоўя — сялянства гісторыка-этнаграфічнага рэгіёна Цэнтральнае Падняпроўе: этнічная гісторыя народа, які жыў на гэтай тэрыторыі, характар рассялення, гаспадарчыя заняткі і прылады працы, народная архітэктура, традыцыйны касцюм і ткацтва (ручнікі), дэкаратыўна-прыкладное мастацтва.
Экспазіцыя «Магілёў губернскі» адкрыта ў 2004 г. У ёй паказана сацыяльна-эканамічнае і грамадскае развіццё Магілёўскага рэгіёна канца 19 — пачатку 20 стст., ілюструюцца саслоўныя, сацыяльныя, светапоглядныя і іншыя аспекты жыцця насельніцтва. Экспазіцыя знаёміць з адміністрацыйным упарадкаваннем губерні, архітэктурным абліччам губернскага Магілёва і павятовых гарадоў, сацыяльнай і культурнай сферамі жыцця мяшчан, купецтва, дваран, чыноўнікаў, ваенных, духавенства.
У музеі праводзяцца экскурсіі, заняткі на тэмы традыцыйнай культуры, алімпіяды, конкурсы, лекцыі і інш.
Адрас: 212030, г.Магілёў, вул.Першамайская, 8
Тэл.: +375-222-22-01-92
