«МАК» —
карагод. Музычны памер 2/4, 4/4. Мае шмат мясцовых варыянтаў, харэаграфічнае дзеянне якіх пры ўстойлівым кругавым малюнку залежыць ад песеннага тэксту. Агульным з'яўляецца тое, што ўсе варыянты паводле строю маюць форму дыялога: спачатку ставіцца пытанне, а потым на яго адказваюць. У адным з варыянтаў удзельнікі становяцца ў круг і ўнізе бяруцца за рукі. Простымі крокамі ходзяць па крузе супраць ходу гадзіннікавай стрэлкі і спяваюць, адначасова абыгрываючы словы песеннага тэксту, у якім гаворыцца пра тое, як сеюць мак, як ён расце, як яго полюць і г.д. Завяршаецца карагод тым, што мак ядуць. Пашыраны на Усходнім Палессі.
У другім варыянце — карагодзе-гульні — удзельнікі ўтвараюць круг, у сярэдзіне якога знаходзяцца выбраныя хлопец або дзяўчына («мак»). Спачатку ўсе ідуць па крузе і спяваюць. Потым задаюць пытанне таму, хто знаходзіцца ў крузе, а той адказвае. Як толькі ўдзельнікі зададуць апошняе пытанне: ці мак паспеў або пара мак трусіць, усе збягаюцца ў сярэдзіну круга і пачынаюць тузаць «мак».