МАЛАДАЯ — назва асобы жаночага полу, якая выходзіць замуж, з пачатку вясельнага абраду або заручын да заканчэння вяселля. Называюць яшчэ нявеста, нявехна, маладуха, малодка, княгіня, малада княгіня, маладзёха.

Асноўныя атрыбуты маладой, калі яна выходзіць замуж першы раз і не мае дзяцей, — падвянечны вянок з руты, іншай зеляніны і кветак (натуральных або штучных) на галаве з мноствам разнаколерных стужак, якія звісаюць па распушчаных валасах на плечы, або вэлюм. Да рукі маладой прывязаны доўгі вышыты ручнік (радзей — хустка), за які яе вядуць.