МАРШ (франц. marche літаральна шэсце, рух наперад) – імправізацыйны танец. Музычны памер 2/4, 4/4. Тэмп умерана хуткі.
Назва паходзіць ад музычнага жанру – марша. У танцы ўдзельнічае вялікая колькасць выканаўцаў. Асноўныя рухі нагадваюць маршыроўку салдат. Выконваўся звычайна ў канцы
вечарынкі, быў абавязковым кампанентам традыцыйнага вясельнага рытуалу. Марш танцавалі ў пачатку
вяселля, у час провадаў маладых да шлюбу (суправаджальны марш), пры сустрэчы маладых (стрэчны марш), калі абдорвалі маладую (надзельны марш) і калі маладую адпраўлялі да маладога (развітальны марш).
Пашыраны па ўсёй Беларусі. У Глыбоцкім раёне зафіксаваны варыянт, у якім, калі госці разыходзіліся з вяселля, танцавалі пад музыку марша на
лаўках, пераапрануўшыся хто ў «цыгана», хто ў «мядзведзя». Калі выканаўцы ламалі лаўку, гаспадар павінен быў іх за гэта адорваць.
Марш як танец выкарыстаны балетмайстрамі ў беларускіх балетах «Альпійская балада», «Тыль Уленшпігель».