МАЗЫРСКАЕ ШКЛО – шкляныя вырабы XII – XIX стст. з Мазыра. XII – XIII стст. датуюцца фрагменты шкляных пацерак і бранзалетаў (гладкіх, кручаных, плоска-выпуклых) кіеўскага, беларускага (магчыма, са Свіслачы, Асіповіцкі раён), візантыйскага паходжання. XIII – XIX стст. датуецца посуд (цэлыя вырабы і фрагменты) празрыстага каляровага шкла (жоўтага, жоўта-зялёнага, зялёнага і інш.).

Вырабы XVI – XIX стст. – пасудзіны для вадкасцяў, сталовы і аптэчны посуд, ваконнае шкло ў форме круглых дыскаў дыяметрам 20, 21, 25 см. Бутэлькі XVII – XIX стст. з зялёнага шкла, выкананыя метадам адвольнага фармавання або выдзьмутыя ў формы, маюць цыліндрычныя тулавы і высокія рыльцы.

Кварты XVII-XVІII стст. мелі квадратныя або прамавугольныя донцы, пакатыя плечукі, кароткія шыйкі і вусці, аздобленыя шклянымі круглымі жгутамі або плоскімі стужкамі. На квартах XIX ст. часта змяшчалі надпісы. Стопкі і шклянкі XIX ст. цыліндрычныя, часам з рыфленымі сценкамі. Келіхі канца XVIII – XIX стст. выдзьмутыя ў формы або зробленыя ручным прасаваннем.