МАЗЫРСКАЯ РАЁННАЯ КАРЦІННАЯ ГАЛЕРЭЯ заснавана ў 1976 у в.Гурыны
Мазырскага раёна рашэннем Мазырскага райвыканкама. З 1978 г. філіял Нацыянальнага мастацкага музея Рэспублікі Беларусь, з 19.06.2006 г. галерэя ў падпарадкаванні аддзела культуры Мазырскага райвыканкама.
Галерэя з'яўлялася своеасаблівым культурным цэнтрам Палескага рэгіёна. Сюды прыязджалі мастакі з Мінска, Гомеля. Калі галерэя была філіялам Нацыянальнага мастацкага музея, у 1-м раздзеле яе экспазіцыі, які ўяўляў сабой рэтраспектыву беларускага мастацтва пасляваеннага перыяду, дэманстраваліся творы больш чым 200 мастакоў. У 2-м раздзеле можна было азнаёміцца з заходнееўрапейскім мастацтвам 14 — 19 ст. Асобная зала прысвячалася творчасці мазырскіх мастакоў. Галерэя прымала больш за 6 тыс. наведвальнікаў у год, працавалі лекторыі па беларускім, рускім, заходнееўрапейскім мастацтве, адбываліся сустрэчы з мастакамі.
Пасля перадачы галерэі ў падпарадкаванне аддзелу культуры Мазырскага райвыканкама творы мастацтва вернуты Нацыянальнаму мастацкаму музею. Засталіся толькі карціны і малюнкі В.К.Гоманава, А.В.Бараноўскага, В.П.Цюрына, В.А.Мінейкі і інш., скульптуры кераміста М.М.Пушкара.
Галерэяй кіравалі А.В.Сарокін, Т.Г.Анісімава. З 2006 г. дырэктар Н.С.Краўчанка. Агульная плошча экспазіцыі 274 м², выставачная плошча 86 м². У 2006 г. галерэя закрыта на капітальны рамонт і рэканструкцыю. На 01.07.2008 г. уласнай экпазіцыі не мае.