МЕЕР Андрэй Казіміравіч — беларускі краязнавец 2-й паловы 18 ст.

Аўтар працы «Апісанне Крычаўскага графства або былога староства», складзенай у 1786 г., у якой побач з характарыстыкай прыродна-геаграфічных умоў, стану сельскай гаспадаркі і мануфактурных прадпрыемстваў, складу насельніцтва па этнічнай і канфесіянальнай прыкметах апісаў народны побыт і культуру беларусаў, змясціў некалькі беларускіх фальклорных твораў.

У процівагу рэакцыйным поглядам на народ Меер станоўча характарызаваў беларускіх сялян. Яго праца — каштоўная крыніца для вывучэння гісторыі і культуры Беларусі. Яна надрукавана са скарачэннямі Е.Р. Раманавым у зборніку «Могилёвская старина» (вып. 2, 1901). Рукапіс зберагаецца ў архіве Казанскага універсітэта (Расійская Федэрацыя).