МЕЛЕЖА ІВАНА ЛІТАРАТУРНЫ МУЗЕЙ заснаваны ў 1981 г. ў в.Глінішча Хойніцкага раёна паводле рашэння Хойніцкага райвыканкама. Адкрыты для наведвальнікаў 12.02.1983 г. Музеем кіравалі М.Я.Ярош (сябар І.Мележа), Ю.Я.Кудрыцкая. З 2003 г. дырэктар С.П.Ліпніцкая (пляменніца І.Мележа).

Фонд музея (2008) налічвае 405 адзінак захоўвання, з іх друкаваных выданняў — 139 адзінак, кінафотадакументаў — 122 адзінкі. Агульная плошча 67,2 м².

Экспазіцыя музея размешчана ў 4 пакоях. Першы знаёміць з сялянскім побытам канца 19 — пачатку 20 ст. Сярод экспанатаў: прасніца з ільняной кудзеляй, самапрадка, церніца, ступа, маслабойка, качалка, начоўкі, лапці, льняныя сарочкі.

Экспазіцыя 2-га пакоя пачынаецца са стэнда, на якім змешчаны фотаздымкі бацькоў, бабуль і дзядуляў І.Мележа, яго братоў і сясцёр, аднакласнікаў, фотаздымак школы, дзе вучыўся будучы пісьменнік.

У 3-м пакоі дэманструюцца карціны мастакоў І.А.Шастапалава «На Прыпяці» і «Вясенні матыў», І.Т.Ціханава «Юнацтва Мележа», бюст Івана Паўлавіча, захоўваюцца яго ўспаміны. Сярод экспанатаў: рабочы стол пісьменніка, канапа, 2 крэслы, журнальны столік з друкарскай машынкай, прывезеныя з яго рабочага кабінета ў Мінску.

У 4-м пакоі знаходзяцца асабістыя рэчы І.Мележа: паліто, касцюм, капялюш, кепка, партфель, папка. Асобны раздзел прысвечаны ганаровым граматам, віншавальным тэлеграмам і паштоўкам. Частку экспазіцыі займаюць пераклады твораў пісьменніка на розныя мовы свету.