«МІКІТА» — традыцыйны танец. Myзычны памер 2/4. Тэмп жвавы.
Танец "Мікіта". Выконваюць жыхары вёскі Валовічы Ашмянскага раёна Найбольш тыповы варыянт танца апісаў Е.Раманаў, калі два хлопцы, узяўшыся за процілеглыя канцы палкі, пад музыку, у такт, то адну, то другую нагу спрытна перакідваюць над палкай, быццам бы пералазяць цераз яе. Гэты танец даволі ўтомны і патрабуе спрыту. Дзе-нідзе танцоры пераскоквалі праз палку, прыгаворваючы: «Мікіта, ці то ты? Мікіта, ці то ты? — He я то, мой тата, не я то, мой тата».
У Брэсцкай вобласці танцор браў палку (часта качаргу) за адзін канец, а другі апускаў на падлогу і, прыпяваючы, скакаў цераз яе туды і назад, а потым танцаваў вакол качаргі імправізаваны танец. Часам на падлогу клалі тры паралельныя палкі, часам дзве накрыж і скакалі, танцавалі над імі, імкнучыся не закрануць іх.
Выконваецца танец часцей за ўсё пад прыпеўкі:
За горадам вецер вее,
Там Мікіта жыта сее.
Мікіта, Мікіта,
Шуба Каінам сашыта.
Распаўсюджаны па ўсёй Беларусі.