МІНСКАЕ ВУЧЫЛІШЧА АРГАНІСТАЎ — існавала ў 1872 — 1897 гг. Заснаванае па ініцыятыве каталіцкага святара Ф.Сенчыкоўскага. Было адзіным на землях Беларусі, карысталася папулярнасцю за добра пастаўленае навучанне, утрыманне навучэнцаў на казённы кошт (на кожнага на год адпускалася 120 руб.) і некаторыя прывілеі, што мелі выпускнікі (перавага ў заняцці вакантнай пасады
арганіста).
Вучыліся ў асноўным дзеці сялянаў і мяшчанаў з розных куткоў Беларусі (у 1881 г. — 22 навучэнцы), якіх прымалі па заканчэнні народнага вучылішча. Праграма па музычных дысцыплінах была разлічаная на 5 гадоў, заняткі доўжыліся ад 6 гадзінаў раніцы да позняга вечара. Штодня 5 — 6 гадзінаў аддавалася навучанню граць на аргане і скрыпцы, спевам, музычна-тэатральным дысцыплінам. Адначасова вучні займаліся агульнаадукацыйнымі прадметамі, авалодвалі кравецкай справай. У1876 г. было дазволена пабудаваць або набыць будынак, дзе маглі б займацца да 30 чалавек.