МСЦІСЛАЎСКІ ЦАРКОЎНА-АРХЕАЛАГІЧНЫ МУЗЕЙ існаваў у горадзе Мсціслаў у 1915-41 гг. пры духоўным вучылішчы. У 1923 г. у фондах музея налічвалася 1157 адзінак захоўвання. Меў 5 аддзелаў: археалагічны, нумізматычны, этнаграфічны, царкоўных старажытнасцей і прымеркаваны да 100-годдзя вучылішча. У 1924 г. створаны прыродна-гістарычны, мастацка-прамысловы, бібліяграфічны аддзелы.

Сярод экспанатаў былі косці маманта з кар'ера мясцовай цагельні, макет Замкавай гары старажытнага Мсціслава, каменныя сякеры і кераміка з гарадзішча, манеты Вялікага Княства Літоўскага, Расійскай імперыі 17 — 18 ст., старадрукі і рукапісныя царкоўныя кнігі, узоры народнага адзення, сельскагаспадарчыя прылады працы, вырабы з лазы і дрэва і інш.

Пры музеі дзейнічалі гурткі краязнаўцаў і аховы гістарычных помнікаў; меў свой статут. Экспанаты зніклі ў час Вялікай Айчыннай вайны.