МУЗЕЙ БЕЛАРУСКАГА ПАЛЕССЯ створаны ў г.Пінск паводле рашэння Палескага краязнаўчага таварыства ад 17.10.1924 г. як Палескі краязнаўчы музей. Для наведвальнікаў адкрыты 01.07.1926 г. З 1939 г. называўся Пінскі абласны гісторыка-краязнаўчы музей, з 1944 г. Пінскі абласны (занальны) краязнаўчы музей, з 1954 г. Пінскі краязнаўчы музей, з 1978 г. Беларускі дзяржаўны музей сацыялістычнага пераўтварэння Палесся. З 1990 г. сучасная назва.

Асноўны фонд музея (2008) налічвае 62020 адзінак захоўвання, навукова-дапаможны — 15539 адзінак. Плошча экспазіцыйных і выставачных памяшканняў 1360 м².

Сярод найбольш цікавых экспанатаў музея ўнікальная калекцыя керамічнай пліткі і саркафаг 12 ст., калекцыя зброі, дакументы і кнігі (рукапісныя граматы 14 — 17 ст., Статут Вялікага Княства Літоўскага, надрукаваны ў Вільні ў 1694 г.), друкаваныя выданні 17ст. і інш. У фондзе музея знаходзяцца карціны мастакоў І.Шышкіна, В.Паленава, В.Пярова, К.Макоўскага, Ю.Пэна, В.Цвіркі. П.Масленікава і інш.

Экспазіцыя музея размешчана ў 11 залах. У зале Вялікай Айчыннай вайны расказваецца пра стварэнне аднаго з першых у Беларусі партызанскіх атрадаў пад кіраўніцтвам В.З. Каржа. У зале этнаграфіі прадстаўлены народны касцюм Піншчыны, ткацкія вырабы, вырабы палескіх кавалёў (пасткі, сякеры, замкі), дрэваапрацоўшчыкаў (бочкі, цэбры, міскі), плеценыя прадметы з лазы, саломы і інш. Прадстаўлены драўляны веласіпед, зроблены мясцовым майстрам В.І. Лючыкам у 1931 г. У зале прыроды вялікая калекцыя чучал птушак і жывёл, якія жывуць на балотах і ў лясах Палесся. Выстаўка «Гарадскі побыт пінчукоў пачатку 20 ст.» знаёміць з жыццём гараджан. У экспазіцыі знаходзяцца прадметы мэблі, музычныя інструменты, гадзіннікі, посуд, адзенне і інш.

Музеем падрыхтаваны і праведзены выстаўкі народных умельцаў Брэсцкай вобласці «Палескія майстры», работ Я.Пухава і яго вучняў «Памяці настаўніка» ў гонар 100-годдзя з дня нараджэння мастака-педагога, беларускіх мастакоў з пленэра, прысвечанага Н.Ордзе, маладых пінскіх мастакоў «Грані» і інш.