«НІВА» — штотыднёвая грамадска-культурная газета, што выдаецца Беларускім грамадска-культурным таварыствам (БГКТ) у Польшчы. Выходзіць на беларускай мове ў Беластоку з 4 сакавіка 1956 г. Беласточчына з 1939 па 1941 г. была ў складзе БССР; у 1944 — 1945 гг. паводле пагаднення паміж савецкім і польскім урадамі Беласточчына была перададзеная Польшчы; аднак і цяпер у рэгіёне застаецца шматлікае беларускае насельніцтва. Газета стала важным чыннікам яднання беларускага насельніцтва ў Польшчы.

У розныя гады галоўнымі рэдактарамі былі Георгі Валкавыцкі, Віталь Луба, Яўген Мірановіч, цяпер — Яўген Вапа. Сярод вядомых аўтараў — Уладзімір Гайдук, Янка Жамойцін, Алег Латышонак, Міра Лукша, Юры Typoнак, Віктар Швед, Сакрат Яновіч.

Змяшчае інфармацыю пра эканамічнае і грамадска-культурнае жыццё Беласточчыны, мерапрыемствы БГКТ, расказвае пра яго актывістаў. Рэгулярна друкуе краязнаўчыя матэрыялы, у т.л. мясцовыя легенды, паданні, песні. Mae шырокі карэспандэнцкі актыў. Часта публікуе артыкулы пра Беларусь, прапагандуе яе літаратуру, змяшчае творчыя партрэты сучасных беларускіх пісьменнікаў, мастакоў, дзеячаў культуры, успаміны з грамадска-культурнага жыцця Заходняй Беларусі, матэрыялы па гісторыі беларускай культуры. Друкуе літаратурную старонку, творы сябраў літаратурна-мастацкага аб'яднання «Белавежа», старонку для дзяцей «Зорка», перыядычна змяшчаюцца тэматычныя ўкладкі.