НЯСВІЖСКАЯ РАТУША I ГАНДЛЁВЫЯ РАДЫГалоўная »
НЯСВІЖСКАЯ РАТУША I ГАНДЛЁВЫЯ РАДЫ — помнікі архітэктуры 16 ст. ў г. Нясвіж Мінскай вобласці. Ратушa ўзведзена каля 1596 г. з цэглы на былой Рыначнай плошчы. Перабудавана ў 1752 г. у стылі позняга барока.
Прамавугольны ў плане 2-павярховы будынак з 6-яруснай вежай (4 ніжнія чацверыкі, 2 верхнія васьмерыкі), завершанай гранёным купалам з ліхтаром. У 1836 г. пажарам знішчана завяршэнне вежы. У сярэдзіне 19 ст. чацверыкі накрыты пакатым шатровым дахам; асноўны аб'ём — высокім кроквенным дахам з вальмай на паўднёвым тарцы.
У 1990-я г. адноўлена ў першапачатковым выглядзе паводле праектнага плана канца 16 ст. і гравюры Т.Макоўскага 17 ст. Фасады амаль пазбаўлены дэкору. Узроўні ярусаў вежы і памяшканняў ратушы не супадаюць і злучаны драўлянымі ўсходамі.
Гандлёвыя рады спачатку размяшчаліся сіметрычна абапал ратушы па даўжыні будынка. Паміж імі былі нешырокія праезды з арачнымі брамамі на тарцах. Ячэйкі-крамы былі адкрыты праёмамі ў бок праездаў; частка гандлёвых памяшканняў знаходзілася ў першым ярусе ратушы. У сярэдзіне 18 ст. гандлёвыя рады перабудаваны: прадоўжаны за будынак ратушы, абкружылі яе з трох бакоў, утвараючы П-падобны ўнутраны замкнёны дворык; ячзйкі-крамы пераарыентаваны праёмамі да плошчы і прылеглых вуліц. Невысокія падоўжаныя карпусы гандлёвых радоў накрыты аднасхільнымі дахамі (са схілам у бок унутранага двара). Вулічныя фасады вырашаны ў выглядзе аркады, завершаны высокім атыкам. У дэкоры выкарыстаны прафіляваныя карнізы, абрамленні праёмаў, філянговыя нішы.
Аўтар: Т.В.Габрусь Крыніца: Беларуская энцыклапедыя |