НОВАЛУКОМЛЬ — горад раённага падпарадкавання ў Чашніцкім раёне, на паўднёва-ўсходнім беразе Лукомскага возера. За 23 км ад Чашнікаў. Насельніцтва 14,1 тыс. чалавек (2009), 13073 чалавека (на 1 студзеня 2015 г.).

Заснаваны непадалёк в. Лукомль у сувязі з будаўніцтвам Лукомскай ДРЭС (пачалося ў 1964 г.) як пасёлак ДРЭС (пад назваю Піянерны) у Бешанковіцкім, з 1965 г. у Чашніцкім раёнах. 3 31 снежня 1965 г. гарадскі пасёлак, з 31 ліпеня 1970 г. — горад.

Славутыя мясціны: Лукомская ДРЭС (1964) і Уваскрасенская царква (1994).