ПАСІЎНЫ СЛОЎНІК — частка слоўнікавага складу мовы, якая мала выкарыстоўваецца ў жывым штодзённым маўленні, але зразумелая ўсім, хто валодае гэтай мовай. Проціпастаўляецца актыўнаму слоўніку. Пасіўны слоўнік складаюць састарэлыя словы (гістарызмы і архаізмы), што выйшлі або выходзяць з ужытку, і неалагізмы, якімі толькі пачынаюць карыстацца. У працэсе развіцця мовы і грамадства словы могуць пераходзіць з пасіўнага слоўніка ў актыўны і наадварот. Напрыклад, у савецкі час з пасіўнага ў актыўны перайшлі словы «адмірал», «гвардыя», «дзяржава», «дойлід», «палкоўнік», «статут», «урад».