«ПОЛОЦКО-ВИТЕБСКАЯ СТАРИНА» — (да 1910 года «Труды Витебской учёной архивной комиссии»), перыядычны зборнік навуковых працаў, гістарычных артыкулаў, архіўных дакументаў. Падрыхтаваны і выдадзены Віцебскай вучонай архіўнай камісіяй у 1909—1916 гадах у Віцебску.

Выйшлі чатыры кнігі (выпускі): «Труды Витебской учёной архивной комиссии», книга 1, 1910 год; «Полоцко-Витебская старина», книга 1, 1911 год; выпуск 2, 1912 год; выпуск 3, 1916 год. У «Полоцко-Витебской старине» надрукаваныя працы і артыкулы «Полацкі князь Усяслаў і яго час» Дз.Леанардава, «Сказанні ісландскіх або скандынаўскіх сагаў пра Полацк, князёў полацкіх і раку Заходнюю Дзвіну» і «Гістарычны нарыс Віцебскай Беларусі» А.Сапунова, «Мястэчка Бешанковічы» I.Рабініна, мемуары ўдзельнікаў вайны 1812 года ў Беларусі, справаздачы аб працы Віцебскай вучонай архіўнай камісіі.