РАКАЎСКАЯ КАПЛІЦАГалоўная »
РАКАЎСКАЯ КАПЛІЦА размяшчаецца на каталіцкіх могілках на ўсходняй ускраіне вёскі Ракаў Валожынскага раёна Мінскай вобласці. Пабудавана ў 1862 годзе з цэглы як родавая пахавальня. Пры ўваходзе на могілкі па восі капліцы размешчана брама- званіца — трохпралётная аркада з цэнтральным лучковым праездам і двухарачным ярусам- звонам.
Помнік архітэктуры класіцызму з элементамі рэтраготыкі. Прамавугольнае ў плане збудаванне з паўкруглай апсідай накрыта двухсхільным дахам. Галоўны фасад вылучаны арачным уваходным парталам, завершаны трохвугольным франтонам з чацверыковай сігнатуркай і вуглавымі пінаклямі; у тымпане круглая люкарна-ружа. Карніз расчлянёны стральчатай аркай уваходнага партала. Сцены аздоблены гранёнымі пілонамі (вуглавыя завершаны пінаклямі), расчлянёны пілястрамі ў прасценках паўцыркульных аконных праёмаў.
У інтэр'еры зала перакрыта плоскай столлю на падугах. У паўкруглую прастору апсіды ўпісана трапецападобная алтарная частка, за якой створана паўкруглая сакрысція. Над уваходам хоры на двух слупах з бакавой вітой лесвіцай. Пад алтаром — крыпта.
Крыніца: Кулагін А. М. Каталіцкія храмы Беларусі: Энцыкл. даведнік / А. М. Кулагін; фатограф А. Л. Дыбоўскі. — 2-е выд. — Мн.: БелЭн, 2008. — 488 с.: іл.
|