«ВАЛЬС» (франц. valse, ням. Walzer ад walzen кружыцца) – гарадскі бытавы танец. Выконваецца парамі. Заснаваны на плаўным кружэнні, што спалучаецца з паступальным рухам. Музычны памер 3/4, радзей 3/8, 6/8. Тэмп ад павольнага да ўмерана хуткага.
Паходзіць ад нямецкіх, аўстрыйскіх, чэшскіх народных танцаў тыпу лендлера. Узнік у 2-й палове 18 ст. у пачатку 19 ст. пашырыўся па ўсёй Еўропе, стаў адным з найбольш папулярных танцаў у розных слаях грамадства. На Беларусі вядомы з 2-й паловы 19 ст., спачатку ўвайшоў у гарадскі, потым у сялянскі побыт пад назвамі «вальс», «вальц», «валец».
Існуюць разнастайныя яго варыянты — «Вальс з падманам», «Вальс з казой», «Вальс з кабылай», «Вальс ламаны» і інш. Сустракаюцца варыянты шматфігурнага вальса, у якія ўваходзяць танцавальныя рухі з традыцыйных беларускіх танцаў, можа выконвацца ў кадрылі як асобнае калена.
Калі вы маеце нейкую інфармацыю пра гісторыю, культуру, этнаграфію Ганцаўшчыны і хацелі б яе змясціць у сеціве,
вы можаце звязацца з намі напісаўшы ў форму зваротнай сувязі.