ВІЦЕБСКІ МАСТАЦКІ МУЗЕЙ — філіял Віцебскага абласнога краязнаўчага музея. Заснаваны 27.02.1992 г. у г.Віцебск паводле загаду Віцебскага аблвыканкама. 3 2006 г. загадчыца філіяла А.І.Акуневіч.
Асноўны фонд музея (2008) налічвае 4868 адзінак захоўвання, навукова-дапаможны — 1643 адзінкі. Плошча экспазіцыі 700 м².
У экспазіцыі прадстаўлены калекцыі рускага і еўрапейскага фарфору і фаянсу 18 — пачатку 20 ст., вышыўкі беларускіх майстроў 1-й палавіны 19 ст.; посуд Налібоцкай і Урэцкай мануфактур 18 ст. Экспануюцца творы вядомых рускіх мастакоў: І.Айвазоўскага, М.Свярчкова, І.Крамскога, А.Куінджы, I.Лeвітана, В.Пярова, І.Шышкіна, І.Рэпіна і інш.; карціны беларускіх мастакоў і тых, хто працаваў у Беларусі: В.Бялыніцкага-Бірулі, С.Заранкі, І.Хруцкага і інш.; прадстаўнікоў Віцебскай мастацкай школы: Ю.Пэна, З.Азгура, А.Бразера, С.Гершова, Л.Лейтмана, Я.Мініна, А.Рома, Л.Рана, С.Юдовіна, Д.Якерсона; сучасных мастакоў Беларусі, у тым ліку Віцебшчыны, Расіі і інш.
Музей арганізуе выстаўкі, сустрэчы з мастакамі, скульптарамі, майстрамі дэкаратыўна-прыкладнога мастацтва. Пры ім працуе дзіцячая мастацкая студыя. Мае рэстаўрацыйную майстэрню.
Калі вы маеце нейкую інфармацыю пра гісторыю, культуру, этнаграфію Ганцаўшчыны і хацелі б яе змясціць у сеціве,
вы можаце звязацца з намі напісаўшы ў форму зваротнай сувязі.