ВЫДЗЕЎБАНЫ ПОСУД — адзін з відаў драўляных ёмістасцей, прадметаў даўбёжнага рамяства. Па вонкавай форме падзяляецца на карытападобны і цыліндрычны (конусападобны).

Карытападобны выдзеўбаны посуд служыў для шматразовага паўсядзённага выкарыстання: карыты і камягі для кармлення хатняй жывёлы, ночвы для мыцця бялізны, пыланкі для правейвання круп, карцы для пітва.

Цыліндрычны выдзеўбаны посуд, часцей з накрыўкай, ужываўся звычайна для захоўвання розных прыпасаў: кадаўбы на зерне, ліпаўкі на мёд, фаскі на масла ці мёд. Шмат выдзеўбанага посуду цыліндрычнай формы рабілі ў форме пэўнага бандарнага посуду (кублы пад адзенне, бойкі для збівання масла, кадушкі на муку, жлукты для мыцця бялізны).

Функцыянальная мэтазгоднасць і паўсядзённае ўжыванне абумоўлівалі сціпласць або поўную адсутнасць дэкору такіх пасудзін. Зрэдку такі посуд (карцы, сальніцы, фаскі) упрыгожвалі разьбой ці выпальваннем. У наш час выдзеўбаны посуд амаль выйшаў з ужытку.