«ЖУРАВЕЛЬ» – маска-персанаж у старажытным народным калядным абрадзе. Узнікла ў часы язычніцтва і звязана, як мяркуюць, з татэмічным ушанаваннем аднайменнай птушкі. Найбольш пашырана на Палессі, дзе захавалася і ў наш час. Называюць таксама «Жораў», «Бусел».

Маска ўяўляе сабой насаджаную на кій драўляную птушыную галаву, да якой прымацоўвалі прызбораную посцілку ці прасціну. На ролю «жураўля» выбіралі юнака, здольнага пластычна перадаць звычкі і характар паводзін птушкі. Як маска-персанаж народнай смехавой культуры «журавель» уваходзіў у абходны гурт калядоўшчыкаў поруч з «Казой», «Кабылай», «Мядзведзем».

Выступленні яго мелі імправізацыйна-гульнёвы характар: ён танцаваў, дзёўб прысутных, заглядваў у гаршкі са стравай і г.д.