«ЖУРНАЛ МИНИСТЕРСТВА ВНУТРЕННИХ ДЕЛ» – часопіс, орган Міністэрства ўнутраных спраў Расіі. Выдаваўся ў Пецярбургу ў 1829-61 гг. Змяшчаў афіцыйныя дакументы, звесткі пра дзейнасць міністэрства, статыстычныя матэрыялы, апісанні гарадоў, губерняў і інш. Некалькі статыстычных публікацый прысвяціў Беларусі: «Статыстычны агляд губернскага
горада Магілёва» (1837, 1840), «Статыстычныя звесткі пра Віцебскую губерню» (1841), «Медыка-статыстычныя нататкі пра Магілёўскую губерню» (1848) і інш.
Праблемам развіцця эканомікі Беларусі, становішча сялян, пытанням гісторыі, этнаграфіі і фальклору беларусаў прысвечаны артыкулы і нарысы «Паўночна-Заходні край імперыі ў мінулым і сучасным выглядзе» М.I. Надзеждзіна (1843), «Нарысы Беларусі» P.А. Падбярэскага (пераклад з польскай, 1845), «Дарожныя нататкі пра Заходнюю і Паўднёва-Заходнюю Расію» К.I. Арсеньева (1845), «Нататкі пра Беларусь» М.С. Шчукіна (1846).