ЗЯЛЯЎСКІ Пётр Янавіч (08.08.1917, в. Слабодка Браслаўскага раёна – 19.10.1995) – самадзейны мастак разьбы па дрэве. Разьбярствам пачаў займацца ў сталым узросце пад уплывам рэлігіі. Працы пераважна на біблейскую і міфалагічную тэматыку. У творчасці кіраваўся толькі ўласнымі ўяўленнямі ды інтуіцыяй, імкнучыся дасягнуць падабенства ў выявах людзей і жывёлаў. Доўгі час шматфігурныя кампазіцыі «Святое сямейства» і «Новая эра» ўпрыгожвалі франтон, фасад і ўчастак сядзібы ў ягонай вёсцы. Працы знаходзяцца ў раённым краязнаўчым музеі і Цэнтры рамёстваў, а таксама – у прыватных калекцыях.