19 жніўня споўнілася 70 год таленавітаму пісьменніку і журналісту, крытыку і перакладчыку – Віктару Гардзею. На наступны дзень, з нагоды юбілею, у вёсцы Вялікія Круговічы адбылася творчая сустрэча «І сэрцам, і думамі з вамі…».
Павіншаваць юбіляра з саліднай датай сабраліся дарагія Віктару Канстанцінавічу людзі, якія любяць і паважаюць яго творчасць, калегі па пяру і сябры дзяцінства, родныя і блізкія. Шмат цёплых і добрых слоў гучала ў адрас імянінніка. Віншаванні, падарункі, успаміны, песні – усё ў гэты дзень было для яго! Асабліва шчыра гучалі песні, поўныя любові да роднага краю, на словы Віктара Гардзея.
Узорны лялечны тэатр «Усмешка» раённай дзіцячай бібліятэкі і народны тэатр «Паланіца» Вялікакруговіцкага СДК парадавалі вяскоўцаў і імянінніка выступленнямі па творах знакамітага земляка.
|