Сёння ў нядзелю 26 лістапада на 66-м годзе жыцця памёр вядомы паэт Алесь Канстанцінавіч Каско. Развітанне з паэтам адбудзецца заўтра ў панядзелак 27 лістапада ў горадзе Жабінка.

Алесь Каско нарадзіўся 10 снежня 1951 года ў вёсцы Чудзін Ганцавіцкага раёна Берасцейскай вобласці ў сялянскай сям'і.

У 1968 годзе паступіў на беларускае аддзяленне філалагічнага факультэта Берасцейскага педагагічнага інстытута. На пачатку 1971 года перапыніў вучобу. Выкладаў расейскую мову і літаратуру ў Рагазнянскай сярэдняй школе Берасцейскага раёна, беларускую мову і літаратуру ў Чудзінскай сярэдняй школе. Служыў у Савецкай Арміі (1971-1973 гады). Зноў працаваў у Чудзінскай сярэдняй школе і працягваў вучобу завочна. У 1974 годзе перавёўся на стацыянарнае аддзяленне Берасцейскага педінстытута (скончыў у 1976 годзе). У 1976-1984 гадах – караспандэнт жабінкаўскай раённай газеты «Сельская праўда». З 1984 года працаваў рэдактарам на Берасцейскай абласной студыі тэлебачання. Сябра СП СССР з 1984 года.

Літаратурнай працай займаўся з 1968 года. Першыя вершы ў рэспубліканскім друку апублікаваў у 1970 годзе (газета «Чырвоная змена»). Аўтар зборнікаў паэзіі «Вестка» (1979), «Скразная лінія» (1982), «Набліжэнне» (1989), «Час прысутнасці» (1994), «Сорак пяць» (1997), «Нічога больш» (2011), «Межавыя знакі» (2014).

Доўгі час узначальваў Брэсцкую абласную філію Саюза беларускіх пісьменнікаў.