Галоўная » 2022 » Лістапад » 14 » Раённае свята «Вітаю цябе, мой народ» да 140-годдзя з дня нараджэння Якуба Коласа
15:54
Раённае свята «Вітаю цябе, мой народ» да 140-годдзя з дня нараджэння Якуба Коласа
У пятніцу, 11 лістапада, ў Ганцавіцкім раёне адсвяткавалі 140-годдзе з дня нараджэння Якуба Коласа. З гэтай нагоды Ганцавіцкая цэнтральная раённая бібліятэка імя Васіля Фёдаравіча Праскурава арганізавала Коласаўскія чытанні «Якуб Колас: нашчадкам памяць зберагаць».
Удзельнікі раённага свята «Вітаю цябе, мой народ» да 140-годдзя з дня нараджэння Якуба Коласа
Праўнучка пісьменніка, Васіліна Міцкевіч, прадставіла новую кнігу «Табой я жыў, табой жыву…», прысвечаную жонцы Якуба Коласа Марыі Дзмітрыеўне Каменскай.
Пра дзейнасць Дзяржаўнага літаратурна-мемарыяльнага музея Якуба Коласа распавядала Ірына Мацяс, дырэктар установы.
З дзейнасцю Пінкавіцкага народнага літаратурна-этнаграфічнага музея Якуба Коласа пазнаёміла гаспадыня ўстановы Жана Верыч.
Краявед з Лунінеччыны, Васіль Туміловіч, раскрыў прысутным малазнаёмыя старонкі жыцця Якуба Коласа, які некаторы час жыў і працаваў у гэтым краі.
Пра літаратурнае краязнаўства вяла гаворку Святлана Марцінкевіч, загадчык раённай дзіцячай бібліятэкі, пра адносіны да роднай мовы і паэтычнага твора Якуба Коласа «Сымон музыка» — паэт Аляксей Галаскок.
Ураджэнка вёскі Люсіна і настаўнік-філолаг, Людміла Трафімчык, узгадала сваё дзіцячае ўспрыманне твораў Якуба Коласа і важнасць выкладання іх у школе.
Тэму «Месца класікі ў сучасным свеце» раскрыла прадстаўніца моладзевай аўдыторыі — Яўгенія Пракапчук.
Госці прайшліся па Алеі пісьменства да помніка маладому Якубу Коласу, дзе адбылося ўскладанне кветак.
Цёпла і хлебасольна сустракалі гасцей ў аграгарадку Люсіна.
Тут яны прынялі ўдзел у акцыі «Дрэва пісьменніка», дзе былі пасаджаны чатырнаццаць маладзенькіх дубкоў і наведалі музей пісьменніка ў Люсінскім дзіцячым садку-СШ імя Якуба Коласа.
Калі вы маеце нейкую інфармацыю пра гісторыю, культуру, этнаграфію Ганцаўшчыны і хацелі б яе змясціць у сеціве,
вы можаце звязацца з намі напісаўшы ў форму зваротнай сувязі.