" Мы ўжо як родныя сёстры — кажа жыхарка вёскі Раздзялавічы Соф'я Мікалаеўна Рабцэвіч, — нас родніць і хлеб, і вёска, і песня". Яна ставіць на абрус дзежку з расчыненым хлебам, замешвае, як рабіла гэта ўсё жыццё, як вучылі маці і бабуля, як і дагэтуль робяць Ганна Рабцэвіч, Таццяна Рабцэвіч і яшчэ адна Соф'я Рабцэвіч, толькі Фёдараўна. У жанчын аднолькавае прозвішча, бо ўсе яны замужам за братамі Соф'і Фёдараўны. У Раздзялавічах іх клічуць "завіцамі".
— Мы з дзяцінства разам гадаваліся, гулялі, вучыліся і працавалі, потым сталі сваячкамі — працягвае гаспадыня.— А калі яшчэ і заспявалі разам, калектыў свой гэтак і назвалі "Завіца". Цяпер насамрэч раднейшыя за ўсіх. Вось і Гэля Кісялевіч да нас далучылася.
У 2000 годзе раздзялавіцкім спявачкам за стараннае захаванне песеннай традыцыі і самабытных мясцовых абрадаў было прысвоена ганаровае званне народнага фальклорнага гурта. Адна з гэтых традыцый — выпечка каравая альбо звычайнага хатняга хлеба. Што-што, а хлеб сястрыцы пякуць надзвычай смачны.
— Ніякі хлеб у краме не параўнаецца з нашым, — у адзін голас кажуць "завіцы" Рабцэвіч.
|