І хаця ён даўно жыве ў Маскве, сваім мастацкім талентам служыць і Беларусі, роднай Ганцавіцкай старонцы, дзе зрабіў першыя крокі па жыцці. А гэтым лістападаўскім днём масквічы сабраліся на прэзентацыю новай кнігі Алеся Кажадуба — «Выпадак на Нікіцкай», якая пабачыла свет у вядомым выдавецтве «У Никитских

ворот».

Як празаік, як уніклівы ў сутнасць чалавечых стасункаў з навакольным светам літаратар, як тонкі мастак слова і разважлівы псіхолаг, член пісьменніцкіх саюзаў Расіі і Беларусі, Алесь Кажадуб адзначаны літаратурнымі прэміямі Міхаіла Шолахава, Івана Буніна, прэміяй Антона Дэльвіга «Завернасць Слову і Айчыне».

Пачынаў Алесь Кажадуб пісаць па-беларуску, з першымі апавяданнямі выступаў учасопісе «Маладосць». А яшчэ ў Беларусі добра ведаюць яго ўнёсак у прапаганду беларускай літаратуры са старонак «Литературной газеты». Газета ў газеце «Лад», якую выпускаў у «ЛГ» Алесь Кажадуб, для многіх сталася творчым мастом з Беларусі ў шырокі свет, найперш — у Расію, тыя краіны, дзе шануюць і ведаюць рускую мову. І цяпер наш зямляк вельмі шмат робіць для беларуска-расійскага літаратурнага супрацоўніцтва.

На прэзентацыі ў беларускім пасольстве пра творчасць Алеся Кажадуба шмат добрых слоў сказалі пісьменнікі і журналісты Віктар Пронін, Іван Сабіла, Любоў Турбіна, Міхаіл Папоў, Юрый Баранаў, Сяргей Казначэеў, Пётр Ладоншчыкаў, Андрэй Варанцоў, Пётр Каліцін і іншыя сябры і ўважлівыя чытачы твораў нашага зямляка.

Нагадаем, што ў апошнія гады дзве кнігі Алеся Кажадуба — «Эліксір жыцця» і «Русь і Літва» — пабачылі свет у Мінску ў Выдавецкім доме «Звязда». Абедзве работы атрымалі добрыя водгукі і хутка разышліся з паліц кнігарняў.