АНАМАСТЫКА (грэч. onomastikos які адносіцца да наймення; onyma імя, назва) — раздзел мовазнаўства, што вывучае паходжанне, структуру і функцыяніраванне ўласных імён і назваў. Уключае антрапаніміку, тапаніміку (падзяляецца на айканіміку, гідраніміку, мікратапаніміку), этнаніміку. Уключае таксама тэаніміку, зааніміку і інш., што вывучаюць адпаведна ўласныя імёны багоў і міфалагічных істот (Пярун, Лясун, Вадзянік), клічкі жывёл (Жучка, Лыска). Анамастычны матэрыял — своеасаблівы хавальнік шматлікіх, часта не зафіксаваных інш. крыніцамі фактаў гісторыі, культуры, мовы народа.