ВІННІК Ульяна Пятроўна нарадзілася ў вёсцы Хатынічы Ганцавіцкага раёна Брэсцкай вобласці. Больш за сорак гадоў працавала ва ўстановах культуры, была кінамеханікам у вёсках Хатынічы і Боркі, спявала ў фальклорным калектыве.
Ткацтвам і вышыўкай пачала займацца з дзяцінства і гэтае захапленне пранесла праз усё жыццё.
ЗАНЬКА Валянціна Васільеўна нарадзілася ў горадзе Ганцавічы Брэсцкай вобласці. З народнай творчасццю была знаёма яшчэ з дзяцінства — займалася ў розных гуртках пры Доме піянераў і школьнікаў, не раз удзельнічала ў выставах па вышыўцы, аплікацыі з розных матэрыялаў (палатно, бераста, саломка).
У 1988 годзе скончыла Брэсцкае прафесійна-тэхнічнае вучылішча №26 імя Д.М. Карбышава па спецыяльнасці «Кравец жаночага і дзіцячага адзення». Пасля заканчэння якога працавала на камбінаце бытавога абслугоўвання насельніцтва ў горадзе Ганцавічы.
ІВАНОВІЧ Вольга Паўлаўна нарадзілася ў вёсцы Люсіна Ганцавіцкага раёна. Яна — майстар народных промыслаў, ее профіль — традыцыйны мастацкі роспіс па тканіне, шкле, дрэве і гліне.
У 1996 годзе скончыла Кобрынскае прафесійна-тэхнічнае вучылішча №105 па спецыяльнасці "Майстар роспісу па дрэве”.
КАЗАК Ніна Мікалаеўна нарадзілася ў вёсцы Хатынічы Ганцавіцкага раёна Брэсцкай вобласці. Пераняўшы ў дзяцінстве ад маці тэхніку ткацтва, Ніна Мікалаеўна большую частку жыцця прысвяціла любімай справе.
Матчыны ўрокі рукадзелля не забывала нават, калі працавала маляром на будоўлі, на трыкатажнай фабрыцы, цялятніцай на ферме.
КРЫСЮК Феанія Яўстаф’еўна — знакамітая на Ганцавіцкай зямлі ткачыха, вышывальшчыца і вязальшчыца. Нарадзілася ў невялічкай панадланьскай вёсачцы Лахоўшчына, што на Ганцаўшчыне, у сям’і майстравітых людзей. У вялікай сям’і яна была адзінай дзяўчынкай, таму з маленства прыйшлося дапамагаць маці адзяваць сям’ю.
З усяго рукадзелля асабліва падабалася ткацтва, вышыўка і вязанне, з якімі яна не разлучалася ўсё жыццё.
МУХА Марыя Іванаўна нарадзілася ў вёсцы Лактышы Ганцавіцкага раёна Брэсцкай вобласці. У 1988 годзе скончыла Мінскі інстытут культуры і працавала ва ўстановах культуры Ганцавіцкага раёна.
Марыя Муха авалодала ўсімі вядомымі на Ганцаўшчыне тэхнікамі і прыёмамі вышыўкі: крыжыкам, лікавай і адвольнай гладдзю, мярэжкай. Зараз прафесійна займаецца ручной вышыўкай, шмат часу аддае вывучэнню традыцыйнай культуры свайго раёна.
ШЭПЯЛЕВІЧ Віталій Леанідавіч нарадзіўся ў горадзе Ганцавічы Брэсцкай вобласці. Скончыў Мірскае мастацкае вучылішча па спецыяльнасці «Ганчар, вытворца мастацкіх вырабаў з керамікі». Два гады працаваў па размеркаванні на Гродзеншчыне.
Вярнуўшыся на Ганцаўшчыну, ён працаваў мастаком у ЖКГ і ДЭУ, але доўга без любімай справы не змог і, у хуткім часе паехаў у Мінск, каб працаваць у ганчарнай майстэрні вядомага майстра Алеся Косткі. Менавіта праца з такім чалавекам, зрабіла Віталія Леанідавіча майстрам сваёй справы, дала добрую практыку, навучыла ўсяму таму, што ён умее.
ЦЯЛУШКА Алена Мікалаеўна нарадзілася ў вёсцы Люсіна Ганцавіцкага раёна Брэсцкай вобласці. Ткацтву навучылася ў дзяцінстве ў сваёй бабулі і мац. На прафесійным узроўні пачала ткаць, калі прыйшла працаваць у раённы Дом рамёстваў майстрам народных промыслаў.
Зараз цудоўна валодае тэхнікай бранага ткацтва і годна працягвае справу па адраджэнні і захаванні гэтага майстэрства.
Калі вы маеце нейкую інфармацыю пра гісторыю, культуру, этнаграфію Ганцаўшчыны і хацелі б яе змясціць у сеціве,
вы можаце звязацца з намі напісаўшы ў форму зваротнай сувязі.
