АСМОЛ — хваёвая сыравіна для смалакурэння. Лепшым лічыўся спелы пнёвы асмол — карчы старых хвой, што праляжалі ў зямлі 5 — 6 гадоў. Выкарыстоўвалі і менш якасны стваловы асмол — ніжнюю частку сасны (калода даўжынёй 1 м і больш).

Нарыхтоўка асмолу была промыслам сялян лясных вёсак. Нарыхтоўвалі яго вясной і ўвосень, у вольны ад палявых работ час. Пні карчавалі з дапамогай жалезнай (на Палессі — драўлянай, абабітай жалезам) лапаты, сякеры і доўгага бервяна — лагі. Прасушаныя карчы расколвалі, збіралі ў кучы, потым звозілі ў смалярню, дзе складвалі ў штабелі — шуркі (1,5 м³).

У наш час асмол карчуюць узрыўчаткай.