«БЯРОЗКА» — танец-карагод. Музычны памер 3/4.Тэмп ад павольнага да ўмерана хуткага. У некаторых раёнах выконваўся дзяўчатамі ў час гукання вясны, абавязковы атрыбут — галінкі бярозы, якія выканаўцы трымаюць у руках. Вядомы таксама як парны карагодны танец, не звязаны з абрадавым дзеяннем.
Характэрныя элементы танца — простыя крокі па крузе і адначасовае прысяданне ўсіх выканаўцаў на пэўны такт музыкі. Танец суправаджаецца шматлікімі і разнастайнымі прыпеўкамі (музыку запісаў Г.Цітовіч). «Бярозка» зафіксавана на ўсёй Беларусі. У Мінскай вобласці танец суправаджаў гульню
«Жаніцьба Цярэшкі».