«БОБ МАЛАЦІЦЬ» — традыцыйны танец. Танцавалі па двое або па трое. Для яго характэрна кручэнне дзяўчыны пад рукой хлопца і раўнамерныя прыстукванні ступнямі аб падлогу (у час выканання танца «сем пар лапцей разбівалі»). Выконваецца пад прыпеўку « Дзед боб малаціў, // Баба падсявала, // Баба падсявала, // Дзеткам раздавала».

У іншых варыянтах танца хлопец перад дзяўчатамі выконвае сольныя імправізаваныя рухі або ўсе выканаўцы становяцца ў круг, бяруцца за рукі і ідуць па крузе, падскокваючы ў такт прыпеўкі, рытмічна ўздымаюць і апускаюць рукі (быццам выконваюць нейкую работу).

Распаўсюджаны на ўсёй Беларусі. Найбольш поўнае апісанне танца зафіксавана у Віцебскай вобласці.