БУДА-КАШАЛЁЎСКАЯ КАРЦІННАЯ ГАЛЕРЭЯ імя Я.Я.Майсеенкі заснавана ў г.
Буда-Кашалёва ў 1999 г. рашэннем Буда-Кашалёўскага выканкома пасля правядзення ў раёне 1-га Міжнароднага славянскага пленэра імя Я.Я.Майсеенкі, у якім прынялі ўдзел мастакі з Беларусі, Расіі і Украіны. Галерэя адкрыта ддя наведвальнікаў 25.08.2007 г. Дырэктар В.М.Новікава.
Асноўны фонд (2008) налічвае 246 адзінак захоўвання, навукова-дапаможны — 172 адзінкі. Дзейнічае 1 выставачная зала плошчаю 232 м².
У галерэі экспануецца эцюд, напісаны Я.Я.Майсеенкам у 1946 г. (адзіная з яго карцін на тэрыторыі Беларусі), а таксама палотны народнага мастака, заслужанага дзеяча мастацтваў Беларусі, ураджэнца Буда-Кашалёўскага раёна В.К.Цвіркі («Вечар»); вучняў Я.Я.Майсеенкі, мастака з Санкт-Пецярбурга Я.С.Барскага («У дарозе», «Родныя мясціны майго настаўніка Я.Я.Майсеенкі», «Пад мірным небам», «Чапаеўцы»), старшыні Гомельскага аддзялення Беларускага саюза мастакоў Р.Я.Ландарскага («Нацюрморт з васількамі», «Залатая восень», «Цішыня»), заслужанага дзеяча мастацтваў Беларусі М.К.Казакевіча («Першы снег», «Восень», «Бабіна лета»).
Праводзіліся выстаўкі: перасоўная жывапісу, графікі і скульптуры; прысвечаная 70-годдзю стварэння Гомельскай вобласці; палотнаў «Класіка і авангард», а таксама фотавыстаўка работ М.М.Васіленкі. У галерэі праходзяць урокі па гісторыі мастацтва, дэманструюцца слайды і фільмы ў мультымедыйнай зале. Дзейнічаюць фотагурток і мастацкі клас.