"ДРАПАК" – імправізаваны танец. Лакальная назва "Драпачок". Музычны памер 2/4. Тэмп хуткі. Генетычна звязаны з рускім народным танцам "Трапак". Адрозніваецца ад яго своеасаблівай манерай выканання: у ім няма такога размаху і разнастайнасці рухаў, што ў рускім танцы.
Асноўны рух – прытупы, што выконваюцца ў розных сінкапічных варыянтах і суправаджаюцца стрыманымі ўзмахамі рук. Часам танец выконваецца энергічна і тэмпераментна. Сустракаецца па ўсёй Беларусі.
Аўтар: А.Л.Варламаў
Крыніца: Этнаграфія Беларусі: энцыклапедыя / Беларуская Савецкая Энцыклапедыя; рэдкалегія: І.П. Шамякін (галоўны рэдактар) [і інш.]. - Мінск: БелСЭ, 1989. - 375 с.
