«МАЛАТОЧКІ» — традыцыйны танец. Музычны памер 2/4. Тэмп жвавы. У час танца выканаўцы моцна ўдараюць нагамі аб падлогу, акцэнтуючы адну з долей такта. Гэта стварае ўражанне калектыўнай працы, выканання своеасаблівага працоўнага працэсу.

Танец складаецца з некалькіх фігур: адначасовы рух усіх танцораў па крузе, хуткае кручэнне ў парах; наступленне і адступленне дзвюх ліній выканаўцаў адзін да другога («сценка на сценку»); злучэнне ўсіх танцораў у адзін ланцужок і закручванне яго ў своеасаблівы «завіток». У канцы танца выканаўцы разбягаюцца ў розныя бакі. Зафіксаваны ў в.Хутарэц-Растовень Пінскага раёна.