МАНСАРДА (франц. mansarge, ад прозвішча архітэктара XVII ст. F.Mansart), паддашак — памяшканне (пераважна жылое) на гарышчы, кожны схіл даху якога складаецца з 2 частак — верхняй пакатай і ніжняй стромкай. Яна дае дадатковую карысную плошчу, а т.зв. мансардавы дах узбагачае сілуэт дома, фармуе фасад, надае будынку своеасаблівы выгляд за кошт выцягнутых па вертыкалі прапорцыяў (прыкладам можа служыць сядзібны дом у г.п.Поразава Свіслацкага раёна).

Мансарда шырока выкарыстоўваецца ў сучасным малапавярховым будаўніцтве. Дамы з мансардамі часта будуюцца ў мяшанай тэхніцы — асноўны аб'ём мураваны, мансарда — з дрэва (в.Замасточча Мінскага раёна).