МІХЕЕНКА Анатоль Міхайлавіч (н. 04.02.1930, б. в.Сітнікі, Полацкі раён) — беларускі самадзейны разьбяр па дрэве, пераважна ў галіне дробнай пластыкі. Удзельнік мастацкіх выставак з 1956 г.

Аўтар кампазіцыяў на фальклорныя, літаратурныя, гістарычныя тэмы. Асноўныя творы: «Гусляр», «Пойдзем у партызаны» (усе 1970 г.), сувенірныя шахматы (1975), «Несцерка» (1976), «Дзед Талаш» (1977), «Партызан» (1978), «Лявоніха» (1980).

Творы майстра вызначаюцца вастрынёй псіхалагічных характарыстыкаў, смелымі выразнымі ракурсамі, абагульненай плоскаснай манераю разьбы. Працы захоўваюцца ў Нацыянальным гістарычным музеі Рэспублікі Беларусь, Нацыянальным мастацкім музеі Рэспублікі Беларусь. Экспанаваліся на выстаўках у ГДР, ПНР, Францыі, ФРГ, Японіі ды іншых краінах.