«МЯЦЁЛАЧКА»Галоўная »
«МЯЦЁЛАЧКА» — традыцыйны танец. Музычны памер 2/4. Тэмп хуткі.
«Мяцёлачка» — масавы парны танец. Двое выканаўцаў становяцца адзін супраць другога і робяць до-за-до, разыходзячыся на свае месцы ўперад спінамі. Некаторы час прытанцоўваюць (рух — крок з прыстаўленнем) тварам адзін да другога, лёгка сыходзячыся і разыходзячыся (то ўправа, то ўлева). Рукі пры гэтым перакідваюць з боку ўбок, чым імітуюць жэсты таго, хто мяце (прыбірае). Рухі рук суправаджаюцца адпаведнымі паваротамі галавы. Магчыма, таму танец і атрымаў назву «мяцёлачка».
Другая фігура танца — кружэнне танцораў у парах, якія бяруцца пад рукі; завяршаецца фігура паваротам кожнага танцора вакол сябе. Выканаўцы ў час танца могуць уключаць у сваю кампазіцыю элементы імправізацыі. Танец зафіксаваны у Івацэвіцкім, Іванаўскім і Ганцавіцкім раёнах Брэсцкай вобласці.
Аўтар: А. Л. Варламаў
Крыніца: Этнаграфія Беларусі: энцыклапедыя / Беларуская Савецкая Энцыклапедыя; рэдкалегія: І.П. Шамякін (галоўны рэдактар) [і інш.]. - Мінск: БелСЭ, 1989. - 375 с. |