Галоўная | Рэгістрацыя | Уваход | RSS | Субота, 27.07.2024, 17:26 | ||||||||||||||||||||||||||||||||
«НА РОСУ»Галоўная »«НА РОСУ» — старажытны карагод. Выконвалі яго на Юр’я, каля засеянага аўсом поля (лічылі, што гэта забяспечыць добры ўраджай). Часта карагод выконвалі толькі мужчыны: выстройваліся ланцужком і з хлебам у руках абыходзілі вакол кожнага поля. Часам удзельнікі карагода качаліся па зямлі, што нібыта рабіла яе больш урадлівай.
У в.Крытышын Іванаўскага раёна абавязковым удзельнікам карагода быў «куст» — убраная зялёнымі галінкамі дзяўчына, якая ішла наперадзе карагода ў суправаджэнні дзвюх дзяўчын, з якіх адна несла хлеб, а другая — сподак. Калі падыходзілі да поля, дзяўчына тройчы праводзіла сподкам па аўсе: быццам бы збірала з каласоў расу і потым «стрэсвала» яе ў фартух «кусту», які раскідваў яе зноў па полі (пры гэтым дзяўчына, якая выконвала ролю «куста», кожны раз паварочвалася вакол сябе).
Часта карагод суправаджаўся песнямі, напрыклад:
Пожжу волы, ды на раннюю росу,
Каго люблю — пазнаю па голасу.
Каго я люблю, той стаіць за плячыма...
Зафіксаваны ў Іванаўскім раёне.
Аўтар: А.Л. Варламаў
Крыніца: Этнаграфія Беларусі: энцыклапедыя / Беларуская Савецкая Энцыклапедыя; рэдкалегія: І.П. Шамякін (галоўны рэдактар) [і інш.]. - Мінск: БелСЭ, 1989. - 375 с. |
|