«ВИЛЕНСКИЕ ГУБЕРНСКИЕ ВЕДОМОСТИ» – афіцыйная газета. Выдавалася на рускай мове Віленскім губернскім праўленнем з 1838 г. да 28.09(11.10).1916 г. Выходзіла ў Вільні, у 1915 г. (№ 61 — 63) у Дзісне, потым у Туле.

Мела афіцыйны і неафіцыйны аддзелы. Неафіцыйны аддзел у 1846-63 гг. выходзіў як самастойная газета пад той жа назвай, з 1864 г. друкаваўся на апошняй старонцы газеты. Асвятляў мясцовае жыццё, змяшчаў даследаванні па этнаграфіі і фальклору [«Гісторыя, геаграфія, этнаграфія і статыстыка заходніх губерняў і Віленскай у асаблівасці», 1847 г. і «Этнаграфія Віленскай губерні», 1848 г. А.Кіркора, «Каляда (у Беларусі)», 1852 г., «Пра зборнік заходнярускіх прыказак і прымавак» P.I.Кулжынскага, 1866 г., і інш.], нарысы па гісторыі («Рух беларусаў на поўдзень Расіі да Кіева», 1868 г.), геаграфіі («Нарыс Лідскага павета ў тапаграфічных адносінах», 1849 г.), эканоміцы, статыстыцы, культуры, народнай асвеце і інш. У розны час выходзілі дадаткі да газеты: «Асобныя артыкулы», «Дадаткі».