«ВІШАНЬКА» —
карагод, танец, гульня. Карагод «вішанька» выконваецца парамі па крузе. Асноўны элемент — адначасовае кручэнне дзяўчыны пад рукой хлопца і вакол яго. Хлопец у гэты час простым крокам рухаецца ўслед за дзяўчынай. Танец «вішанька» выконваецца таксама парамі, але ў кожным рэгіёне падтрымка ў пары розная (простае злучэнне рук «кісць у кісць», накрыж перад сабой і інш.). Простым крокам выканаўцы рухаюцца па крузе, развярнуўшыся, ідуць назад. Характэрны кручэнне дзяўчыны пад рукой хлопца ў адваротным напрамку і пераход да другога партнёра. Танец і карагод зафіксаваны на паўночным захадзе Беларусі.
У гульню «вішанька» («Ірваць вішаньку») гулялі пераважна на
каляды. Дзяўчына станавілася на табурэце паміж двух хлопцаў, якія, узяўшыся за рукі, ахоўваюць яе («вішаньку») ад трэцяга, які стаіць побач з імі. Дзяўчына трымае ў роце саломінку і паварочвае галаву з боку ў бок. Той трэці павінен падскочыць да дзяўчыны і губамі схапіць саломінку. Калі гэта ўдаецца, дзяўчына цалуе яго.