28 кастрычніка з аднадзённай працоўнай паездкай Ганцавіцкі раён наведаў міністр культуры Павел Паўлавіч Латушка. У рамках адзінага дня інфармавання насельніцтва, як член рэспубліканскай інфармацыйна-прапагандыстскай группы Павел Паўлавіч сустрэўся з жыхарамі Малькавіцкага сельсавета.

У сваім выступленні высокапастаўлены госць адзначыў: "Наша культура з'яўляецца неад'емнай часткай агульнаеўрапейскай і нават сусветнай культуры. І мы яе шырока прапагандуем у свеце. На працягу апошніх пяці гадоў Дні беларускай культуры з вялікім поспехам прайшлі ў многіх краінах. Будуць яны праводзіцца і надалей, каб ведаў свет: ёсць такая нацыя -- беларусы".

Пад час мерапрыемства міністру культуры ўсе прысутныя маглі задаць свае пытанні, якія ў большасці сваёй тычыліся культурна-адукацыйнай тэматыкі: якую прафесію можна набыць у Беларускім дзяржаўным універсітэце культуры і мастацтваў; ці добра, што школам надаюць статус юрыдычнай асобы; і ці можна арганізаваць выступленне прафесійных сталічных артыстаў на сцэне Малькавіцкага сельскага клуба.

Пасля сустрэчы з насельніцтвам, якая праходзіла ў актавай зале Малькавіцкай САШ, Павел Паўлавіч наведаў мясцовы сельскі клуб, бібліятэку-музей, потым Хатыніцкія сельскі Дом культуры і бібліятэку, а таксама гарадскі Дом кульутры.

Адным з аб'ектаў наведвання быў Ганцавіцкі раённы краязнаўчы музей, дзе госць пазнаёміўся з гісторыяй і прыродай нашага дзіўнага Палескага краю.

Міністр культуры Рэспублікі Беларусь Павел Паўлавіч Латушка пакінуў такі запіс у кнізе водгукаў музея: "Шаноўныя сябры! Вялікі вам дзякуй за добрую працу на карысць нашай роднай беларускай культуры. Здароўя вам, дабрабыту і добрага настрою".