АРШАНСКІ ЭТНАГРАФІЧНЫ МУЗЕЙ «МЛЫН» — філіял
Музейнага комплексу гісторыі і культуры Аршаншчыны. Адкрыты для наведвальнікаў 23.06.1995 г. Размяшчаецца ў гістарычным цэнтры горада, паміж рэкамі Днепр і Оршыца, у будынку вадзянога млына (помнік прамысловай архітэктуры пачатку 20 ст.). Загадчыца філіяла В.Ф.Сакалоўская.
Асноўная мэта канцэпцыі музейнай экспазіцыі — адлюстраванне найбагацейшай матэрыяльнай і духоўнай спадчыны Аршанскага рэгіёна 2-й палавіны 19 — пачатку 20 ст. Размяшчаецца на 2 паверхах. На 1-м знаходзіцца экспазіцыя «Хлеб наш надзённы», на 2-м — выстаўка традыцыйных рамёстваў Аршаншчыны. Прадстаўлены прылады працы земляроба, прыстасаванні для апрацоўкі льну, багатая калекцыя ткацтва, якая ўключае разнастайныя па дэкоры, каларыце і тэхніцы выканання посцілкі, ручнікі і абрусы, камплекты самабытнага аўтэнтычнага беларускага традыцыйнага касцюма, а таксама ганчарныя вырабы, копыскую кафлю, прадметы сучаснага народнага дэкаратыўна-прыкладнога мастацтва.
З мэтай адраджэння традыцый нацыянальнай культуры пры музеі «Млын» навуковымі супрацоўнікамі арганізавана правядзенне вясельнага абраду для маладых. Ён дазваляе адзначыць дзень нараджэння новай сям'і з выкарыстаннем старажытных абрадавых дзеянняў, рытуалаў і прыкмет, уявіць атмасферу побыту і традыцый продкаў. Абрад спалучае інфармацыю аб традыцыйным вяселлі і практычнае ўвасабленне абраду злучэння маладых, абраду зліцця роду жаніха і роду нявесты.
Адрас: 221030, Віцебская вобл., г.Орша, в.Замкавая, 2
Тэлефон: +375-216-21-20-68
